囡囡最愛的人

去左日本返來咁來，真係一直都唔係好開心，明明見到成屋係日本買返來既史迪仔，但始終都係興奮唔來，明明就因為唔開心，所以先去日本玩，諗住玩完會好開心咁返來，但就係落機一刻，心情就好似坐過山車咁，突然跌左落谷底.......

如果問囡囡一生中最重要的人係邊個，囡囡可以話俾你聽唔係daddy同mummy，因為佢地無陪伴囡囡過最重要既時期，囡囡最重要既人係姑婆，雖然佢唔係囡囡既親阿婆，但我地既感情係無人能取代的。

由出世開始，囡囡就係由阿婆一手帶大的，佢日日帶囡囡去飲茶，帶囡囡去公園玩，渡過了一個美好既童年，就算之後無再同婆婆一齊住，只要一有長既假期，囡囡都一定會去佢到住，因為係阿婆到點都開心過係屋企。囡囡一唔開心都會搵婆婆傾訴，因為佢會明白囡囡既感受，佢會識得點樣哄囡囡，所以囡囡一直都好錫婆婆~~~

直到兩年前，婆婆突然貧血入院，囡囡每一日都去醫院探佢，睇住佢一日比一日瘦，真係好唔開心，之後就算出左院，佢都已經唔可以再好似以前咁行上行落，除左係屋到，邊度都唔去得，係呢兩年間，佢成日都要去醫院再輸血，身體一日比一日差，直到半年前，婆婆突然個胃生左個瘤，但因為年紀太大，唔能夠做手術，婆婆亦因為咁，開始唔肯食野，搞到個人愈來愈瘦，去到最後，更加要住醫院。婆婆兩個星期前先由醫院轉左去老人院，囡囡知道佢一直都唔鐘意住老人院，所以去親探佢佢都唔出聲，囡囡見到佢咁都好唔開心............

可惜，估唔到囡囡只係去左日本4日，返到來婆婆已經過左身............>.<囡囡到而家都仲未接受到婆婆唔係度呢個事實，囡囡到而家都仲好掛住婆婆，囡囡知道呢一世都唔會忘記你，呢一世都愛你，你永遠都係囡囡心目中最愛的人..................