香港凱悅酒店~沙田18中餐廳~

今日終於去左之前少年食神Michael曾經介紹過沙田18食lunch，沙田18係一間位於Hyatt Regency入面既中菜餐廳，18是酒店的門牌號數，亦在風水學和賽馬領域中代表了幸運和吉祥。餐廳設計新顈同時富有中國特式。電視曾經介紹過呢間中菜餐廳最出名既係北京填鴨，因為沙田18的主廚原是北京「長安一號」的大廚，最擅長烤鴨，舉國聞名，想食既人都要預早一日預訂先可以有得食，所以囡囡想食左好耐家喇~~~今次好好彩咁梁生係annual dinner到抽中左北京填鴨半隻+$600現金卷，所以趁佢放假就去左食喇~~~

雖然menu寫左有半隻or一隻叫，但其實點都會上一隻，只係叫半隻既話0個隻鴨會比較細，因為燒親都係一隻，唔會上得半隻咁唔好睇。師傅會係我地面前片0的鴨皮同鴨肉出來，手勢超純熟，好快已經片哂成隻鴨，因為要趁熱食先好食~~~睇下個師傅同個waiter哥哥幾nice~~~個waiter哥哥超好人家，轉頭大家就知道點解>.<

0的鴨片左之後會分3碟上枱，第一碟先是薄薄的一層全皮，單蘸砂糖吃，輕軟香酥，入口即溶，是一流的美食新體驗。但因為係全皮既關係，食左3-4塊已經好膩

第二碟係齌鴨肉，齌食會悶d﹐但係用依個加青瓜夾薄餅食﹐唔太肥膩﹐可以食多幾件。但上呢個已經係一個惡夢既開始，原本呢個會跟2籠各5塊既薄餅，但因為粱生人緣太好既關係，另一個waiter哥哥竟然拎多左2籠俾我地，結果0個2籠都無點過，真係浪費!!!!

至於第三碟就係半皮半肉，呢碟0的肉好嫩滑，就咁食已經好好食~~但其實食左3碟，都只係填鴨一食，我地其實亦都只係得一食，但結果竟然變左三食(咪又係梁生既關係囉).........

呢碟係二食既炒鴨崧(我地無叫過家)

配埋0的生菜食，整生菜包真係一流，0的生菜勁爽口，好食到停唔到~~~

三食係呢個紹菜豆腐鴨骨湯(我地都無叫家)，清清地唔錯，但好似唔夠鴨味

食完鴨之後其實已經飽飽地，雖然仲有$600，但其實只係叫多3個餸，一個甜品已經用哂，但我地得2個人，咩都夠食啦，以下就係我地另外叫既野食，呢個係鄉下仔田魚蝦毛，初頭囡囡一見到都覺得唔係太想食，雖然係好普通既四樣野 --- 花生、蝦乾、魚乾、苟菜，個卻離奇地合拍，呢個好似係東莞菜，囡囡一直都未食過，但daddy同mammy就話好好食，都好值得推介既一個餸

籠仔糯米蒸腩排，用生糯米包住0的生的腩排用文火蒸熟，所以需時較久，糯米一口一啖，啱啱好， 腩排0的油脂已全溶入0的糯米內，糯米軟肉香樣樣齊， 好味呀~

最後一碟係薑蔥鮮竹撈芥菜，呢個好有驚喜，從來都唔知芥菜係咁甜咁爽咁好食家，真係一流，必食之選~~

事實上我地叫既野，除左個甜品，已經全部上哂，但結果，仲有以下既野食.......

呢3個係前菜，有野生木耳拌蜇頭，陳醋雲耳拌烤夫，同埋涼拌虫草花，呢3樣都係得一碗仔，因為係waiter哥哥驚我地太飽，所以每樣俾少少系我地試

北方豬肉餃子，唔錯，幾好食，係得4隻，因為都係試家，我地都食唔哂......

呢個好特別，香脆三鮮鍋貼，有個好脆既網係0的鍋貼上面，從來未試過鍋貼可以咁食，好好味~好特別~~~

最後係手拉牛肉麵，呢度只係半碗，因為都係俾我地試下0者，唔需要咁多，0的牛肉好入味，但0的麵就麻麻，唔係太特別

食左咁耐，囡囡都係最鐘意0的甜品~~~女仔都係鐘意甜品~~~

呢個係呢度獨有既五粮液朱古力雪糕，濃濃既朱古力味同酒味，真係不可不試，但始終有酒係入面，所以囡囡食左兩啖已經無食喇~~~

呢個係茉莉花茶雪糕，好滑，好香茉莉花味，仲要有0的茶味，真係太好食喇，好食到想食多個~~

最後係紅棗軟蛋糕，呢個甜品即叫即做, 要等二十分鐘. 但值得等....蛋糕熱辣辣有淡淡紅棗香，外脆內裏軟綿綿，好像食緊疏乎里咁

囡囡只係得2個人，又點可能食得哂以上既野呢，所以食剩既全部拎返屋企考敬daddy同mammy，多謝哂梁生，今次咩都唔洗俾就可以試哂佢地既招牌菜，真係食得特別開心~~~